Llyn Cowlyd

Taith Hamdden Eryri

5½ milltir / 3 awr i Lyn Cowlyd

9 milltir / 4 awr i Gapel Curig

15 milltir / 8 awr i Drefriw heibio Llyn Cowlyd, Capel Curig a Llyn Crafnant

Mae’r trywydd hwn yn rhan o Rwydwaith Teithiau Cerdded Hamddenol Parc Cenedlaethol Eryri ac yn darparu cysylltiad â theithiau cerdded yng Nghapel Curig a’r cyffiniau.

O’r maes parcio yng nghanol y pentre, croeswch y briffordd o flaen y Felin Wlân a throwch i’r dde. Ar ddiwedd y rhes o siopau, gyferbyn Gwesty Fairy Falls, trowch i’r chwith a cherdded i fyny’r allt. Cerddwch i fyny rhan serth o’r ffordd am ryw 300 llathen ac wedyn fforchiwch i’r dde i fyny ffordd Cowlyd. Wedi 100 llathen, trowch i’r dde i mewn i’r goedwig a dilynwch Drywydd 6. 

Yn y goedwig, mae’r trywydd yn gwahanu â Thrywydd 6 ac yn esgyn drwy weithfeydd hen bwll i ddarparu golygfeydd braf o Ddyffryn Conwy o’r ffordd gul sy’n arwain i dai yn Ardda ac yn dod i ben wrth fferm Tyddyn Wilym.

Drwy’r buarth, mae’r ffordd yn dod yn drywydd sy’n mynd heibio i eglwys a ffermdy yn Nhyddyn-du, y ddau yn adfeiliedig. Oddi yma, mae’r trywydd yn mynd dros rostir agored a all fod yn wlyb iawn yn yr haf ac yn wlyb dros ben yn y gaeaf. Mae’r trywydd yn mynd heibio i ffermdy adfeiliedig arall – Brwnog Isaf – ac yna mae’n cwrdd â ffordd Trefriw-Cowlyd ym Mrwnog Uchaf.

Mae Trywydd 9 yn mynd ymlaen hyd at argae Llyn Cowlyd ac wedyn ar hyd lan y gronfa cyn dringo i ben y dyffryn. Mae Trywydd Trefriw yn dod i ben yma a chewch aildroedio’r un llwybr drwy Dyddyn Wilym, neu ddychwelyd i Drefriw drwy’r ffordd gul o Frwnog Uchaf. Fel arall, cewch ymuno â’r trywyddau yng Nghapel Curig a’r cyffiniau i estyn eich taith, gan gynnwys trywydd sy’n dychwelyd i Drefriw drwy Lyn Crafnant (gweler Ordnance Survey 1:25000 Map of Snowdonia: Outdoor Leisure Map 17. Cliciwch yma i lwytho ‘Taflen Deithiau Cerdded Cylchol Capel Curig – pdf 450kb’ i lawr).